དིང་རི་བ་ལ་རིག་འཛིན་སྔགས་པའི་སྡེ་ཡིས་གདུང་སེམས་མཉམ་བསྐྱེད་བྱས་པ།
སྐུ་ཉིད་ཐོས་པ་དགའ་བའི་མི་སྒེར་འཕྲིན་སྟེགས་སུ་ཕེབས་པར་ཞུ།
གསན་རོགས།
ལུགས་གཉིས་ཀྱི་བྱ་བའི་ཕྱོགས་ནས་ད་ཐེངས་སི་ཁྲོན་ཞིང་ཆེན་དཀར་མཛེས་ཁུལ་སེར་ཤུལ་རྫོང་ཁམས་ཨ་རིག་རྫའི་གླིང་གེ་སར་རིག་གནས་མཐུན་ཚོགས་དང་། རྒྱལ་སྤྱིའི་རིག་འཛིན་སྔགས་པའི་རིག་གནས་མཐུན་ཚོགས། བོད་ཀྱི་གཏེར་སྨན་རིག་གནས་མཐུན་ཚོགས་གསུམ་གྱི་འགོ་གཙོ། བླ་མ་བཀའ་དྲིན་ཅན་ཨ་རིག་གཏེར་སྟོན་གྲགས་པ་མཐའ་ཡས། བླ་མ་ནམ་མཁའ་རྒྱལ་མཚན། སྤྲུལ་སྐུ་ཀུན་བཟང་རྡོ་རྗེ། སྤྲུལ་སྐུ་མཁའ་ཀློང་ངམ་འཇུ་མཁས་གྲུབ། སྤྲུལ་སྐུ་གསང་སྔགས་རྣམ་རྒྱལ། མཁའ་འགྲོ་ཆོས་ཉིད་སྣང་མཚོ། གསོ་རིག་རྒྱུད་འཛིན་པ་རྡོ་རྗེ་རྩལ་རྣམ་གྱིས་འདིར་གཙོ་འགན་ཆེར་བཞེས་གནང་སྟེ་རྐྱེན་ལམ་དུ་ཤོར་ཟིན་པའི་ཤི་བོ་རྣམས་གཏན་བདེ་ཐོབ་ཕྱིར་དང་གསོན་པོ་རྣམས་ཀྱི་བར་ཆད་སེལ་ཕྱིར།
གསེར་དང་། མཚལ། དམ་རྫས་ཚད་ལྡན་རྣམས་ཀྱིས་ཤིང་དཔར། ལག་དཔར་ཁོ་ན་བྱས་པའི་སིདྡྷི། མ་ཎི། ཚིག་བདུན་གསོལ་འདེབས། དག་པའི་ཞིང་མཆོག སྒྲོལ་མ། སྐྱབས་འགྲོ། ལྟུང་བཤགས། ཡིག་བརྒྱ་སོགས་ཀྱི་ཇོ་དར་ཁྲི་དར་ཉིས་བརྒྱ་བཞེངས་བསྐྲུན་བྱས་ནས་རི་མཐོ་ས་གཙང་ལ་བཀྱགས་རྒྱུ་གཏན་ཁེལ་བྱས་པ་དང་། མར་མེ་འབུམ་མཆོད་གཅིག་དང་ཁྲི་མཆོད་ལྔ་སོགས་ཕུལ་བ།
དེ་མིན་འགྲོ་མགོན་གཏེར་ཆེན་གྲགས་པ་མཐའ་ཡས་མཆོག་གི་དབུས་མཛད་དེ་རིག་འཛིན་སྔགས་པའི་སྡེ་གང་མང་ཞིག་གིས་ཟབ་ཆོས་ཞི་ཁྲོ་དགོངས་པ་རང་གྲོལ་གྱི་སྒོ་ནས་གཤིན་ཆོག་དང་། བདེ་སྨོན། བཟང་སྤྱོད་སོགས་ཀྱི་བསྔོ་སྨོན་རྒྱ་ཆེན་པོ་བྱས་ཤིང་།
དེར་མ་ཟད་དངོས་འབྱོར་རོགས་དན་གྱི་ཕྱོགས་ནས་ཀྱང་། གླིང་གེ་སར་རྒྱལ་པོའི་རིག་གནས་ཆེད་ལས་ཨུ་ཡོན་ལྷན་ཁང་དང་རིག་འཛིན་སྔགས་པའི་རིག་གནས་ཞིབ་འཇུག་མཐུན་ཚོགས་ཟུང་གིས། ཐེངས་འདིར་དམངས་སྒོར་115000རིན་གྱི་དངོས་ཟོག་དང་། ལག་དངུལ་སྒོར185000དང་། སྒོར200000རིན་གྱི་ཇོ་ཤཱཀ་རྣམ་གསུམ་ལ་གསེར་ཆབ་དང་མཆོད་མེ་ཇོ་དར་སོགས་ཁྱོན་སྒོར་ཁྲི་50ལྷག་གིས་རོགས་སྐྱོར་བྱས་པ་དག་ལ་གུས་ཕྲན་རང་གིས་ཡི་རང་ཡང་ཡང་ཞུ་བ་ལགས་སོ།།
ཐུགས་བསྐྱེད་ཉི་ཟླ་འཛུམ་པའི་ཟེར་ཕྲེང་གིས། །
ཉམ་ཐག་མྱ་ངམ་ཐང་གི་ཡུལ་མི་ཚོར། །
སྦྱིན་གཏོང་ནོར་གྱི་ཆར་བཟང་འབེབས་པ་ལ། །
ཡི་རང་སྐྱེས་དར་སེམས་པའི་ཀློང་ནས་འབུལ། །
གཏེར་ཆེན་བླ་མ་སྣང་རྒྱལ་དཀར་པོའི་དབུས། །
རལ་བའི་ཟར་འཆིང་རིག་འཛིན་སྔགས་པའི་སྡེས། །
ཤ་རུས་ཁྲག་གཅིག་དིང་རིའི་ཡུལ་མི་ཚོར། །
དངོས་འབྱོར་ནོར་གྱི་དབུལ་སྐྱོབས་གནང་བར་གུས། །
ཁྱད་པར་བྱམས་བརྩེ་མཚུངས་པ་མེད་པའི་ངང་། །
གཤིན་འཁྱམས་འགྲོ་བར་ཆོས་ཀྱི་སྦྱིན་གཏོང་གི །
ཐུགས་བསྐྱེད་སྨོན་པས་རྗེས་བཟུང་གནང་བ་ལ། །
ལྷག་པར་དུ་ཡང་གུས་འདུད་ལན་བརྒྱར་ཞུ། །
ས་ཆེན་ཁྲོས་ཏེ་གནོད་པས་གཙེས་པ་ཡི། །
རྡུལ་དམར་ཀློང་གི་དིང་རིའི་མིང་སྲིང་ཚོར། །
སྐྱིད་སྡུག་མཉམ་དུ་སྐྱེལ་བའི་རོགས་དན་གྱི། །
ལུགས་ཟུང་བྱ་བཞག་འདི་ལ་ཡི་རང་འོས།།
སྤྱིར་ན་མི་རིགས་འདི་ལ་སྲི་ཞུ་དང་། །
སྒོས་སུ་ཕ་ཡུལ་ལུང་པའི་དབུ་རྣའི་ཆེད། །
དངུལ་གྱི་ཁུག་མ་སྣོད་དུ་མ་བཅུག་པར། །
རིགས་ཀྱི་བླ་སྲོག་དོན་དུ་ཕུལ་བ་ལེགས། །
གསོག་པའི་དངུལ་འབོལ་ཁྲག་ལས་གྲུབ་པས་ན། །
རང་གར་སྤྱོད་ལ་སེམས་འཁུར་མང་ན་ཡང་། །
སྤུན་ཟླའི་ན་ཟུག་སྲོག་གི་གསོས་སྨན་དུ། །
འཆིང་བས་མ་བཟུང་ཕངས་མེད་བཏང་བ་ལེགས། །
' fill='%23FFFFFF'%3E%3Crect x='249' y='126' width='1' height='1'%3E%3C/rect%3E%3C/g%3E%3C/g%3E%3C/svg%3E)
འཕྲིན་ཕྲན།｜༡༧༤༣༦༤༤༦༨༢
微信扫一扫
关注该公众号
